آسٹریلیا میں لانگ ڈے کیئر اور سیشنل کنڈر جانے والے بچوں کی خوراک کے حوالے سے والدین کے ذہن میں کئی سوالات ہوتے ہیں۔ کیا بچے سینٹر کا کھانا کھاتے ہیں یا گھر سے خوراک لے جا سکتے ہیں؟ حلال اور ویجیٹیرین ضروریات کس حد تک پوری کی جاتی ہیں؟ اور فوڈ الرجی جیسے حساس مسئلے سے کیسے نمٹا جاتا ہے؟ ان تمام سوالات پر SBS اردو نے 15 سالہ تجربہ رکھنے والی ماہر آمنہ جاوید سے تفصیلی گفتگو کی۔
آمنہ جاوید کے مطابق وکٹوریہ میں اکثر لانگ ڈے کیئر سینٹرز بچوں کو خود خوراک فراہم کرتے ہیں، تاہم بعض مراکز کی پالیسی کے تحت والدین گھر سے بھی کھانا بھیج سکتے ہیں، خاص طور پر ایسے بچوں کے لیے جو کھانے میں چوزی ہوں۔ انہوں نے بتایا کہ داخلے کے وقت والدین سے ڈائیٹری ضروریات جیسے ویجیٹیرین یا حلال خوراک سے متعلق تفصیلات لی جاتی ہیں اور مراکز عموماً ان کی مکمل رعایت کرتے ہیں۔ تاہم فوڈ الرجی، خاص طور پر anaphylaxis جیسی شدید نوعیت کی الرجی، کو نہایت سنجیدگی سے لیا جاتا ہے کیونکہ یہ جان لیوا بھی ہو سکتی ہے۔ ایسے بچوں کے لیے ڈاکٹر کے ساتھ مل کر ایک مخصوص ایکشن پلان تیار کیا جاتا ہے جو ہر کمرے میں آسانی سے نظر آنے والی جگہ پر رکھا جاتا ہے، اور تمام ایجوکیٹرز کو ہر سال فرسٹ ایڈ اور CPR کی تربیت دی جاتی ہے تاکہ وہ الرجی کی ہنگامی صورتحال سے بخوبی نمٹ سکیں۔
