Tej xwm txheej huab cua pauv hloov yuav ua rau muaj ntuj los nag thoob plaws rau sab hnub tej ntug hiav txwv ntawm Australia lub limtiam no, tom qab tau muaj tej xwm txheej huab cua kub sov heev ntau hnub sib lawm liag limtiam dhau los uas tau ua rau muaj tej hav zoov kub hnyiab tsim kev puas tsuaj.
Raws li lub chaw kwv yees thiab ntsuam huab cua (Bureau of Meteorology - BoM) qhia ces ''yuav los nag loj rau ib lub caij twg'' uas yuav pab daws tej xwm txheej hav zoov kub hnyiab kiag tam sim no tab sis tej zaum kuj yuav ua rau muaj dej nyab thiab.
Twb tau muaj tej vaj tse tshaj 700 lub raug puas tsuaj thiab tej hav zoov kub hnyiab ntawm xeev Victoria tau tsim kev puas tsuaj loj kawg nkau li, suav 228 lub tsev thiab 450 lub tsev ntim khoom uas tsis nyob npuab lub tsev loj.
Ua ke no los tej kev puas tsuaj uas lub khaub zeeb cua Tropical Cyclone Koji dhau los tsim yeej tseem ua rau muaj hnub los nag hlob thoob Queensland, thiab zoo li tseem yuav muaj lwm lub khaub zeeb cua rau suam av kawg pem lub xeev nod rau ob hnub so no thiab ces thiaj ua rau muaj txoj kev txhawj xeeb tsam h rov qab raug dej nyab thiab tsam ho rov qab muaj khaub zeeb cua thiab.
Tej nag xob nag cua thiab dej nyab rau xeev NSW thiab Victoria
Sab hnub tuaj NSW thiab Victoria ces tab tom npaj tsam muaj hnub los nag hlob rau ntau lub hli rau lub caij uas muaj tej nag xob nag cua muaj ceem txij hnub zwj Teeb (Thursday).
Tej nag xob nag cua ua ntuj los nag hlob thiab tej xwm txheej uas tej zaum yuav ua rau dej nyab thoob plaws rau tej xeev Queensland, NSW, Victoria thiab ACT, plawv East Gippsland, sab qab teb hnub tuaj ntawm NSW, thiab tej chaw raws tej loj roob hauv pes sab qaum teb ntawm lub xeev no.
Txog hnub zwj Kuab (Friday) ces kev yees tias yuav muaj nag xob nag cua rau plawv sab hnub tuaj thiab hnub tuaj qaum teb ntawm NSW, thiab yeej muaj ntuj los nag sib txuas ntws thiab muaj xob nroo xob laim rau qee thaj chaw sab qab teb ras cov ntug hiav txwv ntawm NSW thiab thoob plaws rau Gippsland.
Raws li kwv yees ces yuav los nag hlob tshaj plaws, nrog cuab hlob, thiab maj mam hla mus rau sab qaum teb raws tej ntug hiav txwv rau ob hnub so no.
Txog hnub zwj Hnub (Sunday), ces yuav muaj tej xwm txheej no ntawm Illawarra, Sydney basin thiab Hunter region uas txhawj tias tsam yuav muaj dej nyab.
Ua ke no los kuj txhawj tsam ho muaj dej nyab ntau lub zos, thiab tsam muaj tej dej phwj ntawm tus dej los nyab ntawm Illawarra thiab tej ntug hiav txwv sab qab teb.
BoM cej luam tias tej paj dej los yeej muaj ntsis qhuav thiab ces tej zaum yuav muaj cib fim dej nyab me ntsis thiab.
Lub khaub zeeb cua tropical cyclone dhau los ua rau ntuj los nag
Kuj kwv yees thiab tias tej dej nag yuav nyab thoob plaws rau ntau thaj chaw sab qaum teb Australia rau lub caij uas lub khaub zeeg cua chaw sov Koji tseem tig mus rau sab qaum teb hnub poob hla Queensland.
Tej xwm txheej ntawm lub khaub zeeg cua Koji tseem yuav ua rau muaj ntuj los nag hlob rau tej zejzog thiab yuav muaj dej nyab txij ntawm Gulf Country mus txog rau Central Coast hnub zwj Teeb (Thursday), thiab tseem yuav muaj nag xob nag cua ua rau ntuj los nag hlob heev txuas ntxiv rau hnub zwj Kuab (Friday).
Lub koom haum kwv yees thiab ntsuam huab cua (Bureau of Meteorology - BoM) kwv yees tias yuav los nag hlob ua rau tej dej noo ntub thawm av to tshaj 100 mm rau sab qaum teb hnub tuaj ntawm xeev Queensland thiab ntau thaj chaw sab hnub poob ntawm xeev Northern Territory (NT) rau lub limtiam yuav los txog no.
Ces thiaj tseem muaj cov kev tshuaj ntsuam tsam ho muaj dej nyab rau 15 tug dej thiab tej kwj deg thoob plaws ntawm lub zos Gulf Country, sab hnub poob thiab plawv xeev Queensland thiab ntawm Cape York.
Tab sis BoM kuj qhia tias tsuas muaj cib fim tsawg txog li 15 feem puas los yog tsawg dua ntawd uas lub khaub zeeg cua Koji yuav rov qab tib los ua ib lub khaub zeeg cua dua ntxiv mus txog rau yam tsawg li hnub zwj Feej (Wednesday) tom ntej no.
Lub caij uas tej xwm txheej huab cua ntaug ntawm Queensland no, kuj tseem muaj ib lub khaub zeeg cua nrug ntawm Cape York uas tsis tshua muaj zog thiab.
Raws li BoM kwv yees ces tej zaum tej xwm txheej huab cua no kuj yuav tig mus rau tej chaw sab hnub poob nrug ntawm tej hiav txwv rau thaum ntxov lub limtiam tom ntej no, uas yuav muaj cib fim txog 25 feem pua ras los ua ib lub khaub zeeg cua nrug ntawm tej ntug hiav txwv sab qaum teb ntawm xeev Western Australia limtim tom ntej no.
Share
