Garma Festival ces yog Australia cov neeg txum tim tau mus sib ntsib sib sau ua ke uas muaj ntau txheeb tus neeg tau mus rau ntawm lub zos Nhulunbuy ntawm qaum teb hnub tuaj ntawm Arnhem Land ntawm xeev Northern Territory. Nod yog tej yuav ua ntawm lub koom txoos Garma thiab leej twg muaj peev xwm koom.
Ntsiab lus:
- Garma yog neeg txum tib ib lub koom txoos kab lis kev cai loj tshaj plaws ntawm Australia.
- Yeej ua lub koom txoos no txhua xyoo rau lub 8 hli ntuj thiab lub koom haum Yothu Yindi Foundation yog tus tswv cuab tswj.
- Yuav muaj Australia tej nom tseem ceeb, tej coj lagluam, tej khoom haum, tej neeg paj nruab/kos duab mus koom rau lub caij lub koom txoos no pab kom muaj kev sib cuag tau ntawm cov kev ua kev zoo siab rau tej koom txoos no thiab tej hauj lwm laj fai kum xeeb.
- Garma Festival yog dab tsi?
- Lub koom txoos Garma Festival pib li cas?
- Ua lub koom txoos Garma Festival ntawm qhov chaw twg?
- Vim li cas koom txoos Garma Festival thiaj tseem ceeb?
- Leej twg koom lub koom txoos Garma Festival?
- Ua dab tsi ntawm lub koom txoos Garma Festival?
Neeg txum tim cov lo lus uas siv ntawm zaj xov xwm no thiab tej ntsiab lus txhais:
- Yolŋu: Txhais tias ‘tib neeg' ntawm neeg txum tim cov lus Yolŋu Matha, uas yog ib pab neeg muaj ntau yam xeem uas nyob ntawm tej zos los yog tej chaw ib puag ncig ntawm sab qaum teb hnub tuaj nyawm Arnhem Land.
- Yolŋu Matha: Ces yog tej lus uas neeg txum tim Yolŋu hais/siv.
- Garma: Neeg txum tim cov lus Yolŋu Matha txhais tias yog cov txheej txheem uas ob tog sib cog kawm.
- Arnhem Land: Ces yog thaj chaw zuag ntse nyob ntawm qhov chaw kawg ntawm xeev Northern Territory rau sab hnub tuaj 500 kilometres ntawm Darwin.
- Nhulunbuy: Ces yog lub zos loj tshaj plaws ntawm East Arnhem Land, Northern Territory, uas nyob nrug rau sab hnub tuaj ntawm Darwin kwv yees li ntawd 1,000km.
- Gulkula: Ces yog ib thaj chaw uas neeg txum tim yeej ib txwm siv ua thaj chaw mus sib ntsib.
- Ganbulapula: Yog ib tug pog koob/yawg koob uas ntseeg tias coj tus Yidaki los rau cov neeg txum tim Yolŋu.
- Yidaki (Uas yog didgeridoo): ces yog neeg txum tim Aboriginal lub raj ntoo tshuab cua nrov ua suab paj nruag.
- Miny’tji: Tej duab muaj fwj huaj uas teev txog tej ntsuj, tej keeb kawm thiab tej chaw.
- Manikay: Ces yog poj koob yawm koob tej nkauj uas teev txog tswv tsim ntuj teb raug, tej chaw, tej ntsuj, tej kev ua tswv kav luaj pua, cov kev sib cuag nrog luaj pua, txuab zeej txuab sim (nroj tshuab xyoob ntoo toj roob hauv pes hauv hav), keeb kwm thiab cim thawj (identities) ntawm ib tsav neeg twg.
- Bunggul: Yog tej koom txoos seev cev uas ib txwm ua.
- Bilma: Cov pas ntoo kos ua duab coj los sib tsoo kom nrhoav ua suab paj nruag (Clapsticks).
Lus ceeb toom: Taw qhia rau neeg txum tim Aboriginal thiab Torres Strait Islander tias zaj xov xwm no teev txog tej neeg txum tim uas tau nruam sim lawm tej npe.
Garma Festival yog dab tsi?
Lub koom txoos Garma Festival ces yog Australia cov neeg txum tim ib lub koom txoos kab lis kev cai uas muaj tej neeg tau mus sib ntsib thiab muaj ntau txheeb tus neeg tau mus rau lub zos Nhulunbuy uas nyog deb heev ntawm sab hnub tuaj qaum teb ntawm Arnhem Land ntawm xeev Northern Territory.
Thiab yeej ua lub koom txoos no txhua xyoo rau lub 8 hli ntuj thiab ua kev zoo siab 4 hnub rau neeg txum tim Yolŋu tej kab lis kev cai.
Cov neeg txum tim Yolŋu ces yog neeg txum tim Aboriginal uas nyob sab qaum teb hnub tuaj ntawm
Arnhem Land thiab raws li cov neeg Yolŋu Matha tej lus, ces los lus 'Garma' txhais tau lub ntsiab lus tias ''yog cov txheej txheem uas ob tog sib cog kawm''.
Thiab yog ib lub tswv yim lees paub tias sawv daws yeej muaj tej txuj ci ib yam dab tsi faib/qhia rau lwm tus. Tsis yog pheej yuav cia ib pab pawg neeg twg qhia lwm tus xwb, ces tej neeg thiaj siv cov kev mloog, cov kev nug coj los pab sawv daws kawm ua ke thiab muaj cov kev hwm tej neeg tej xub ke ua neej uas sib txawv.
Lub koom txoos no thiaj qhia txog neeg txum tim tej miny’tji (art), manikay (song), thiab cov kev seev cev nto npe hu ua bunggul (dance).
Qhov tseem ceeb tshaj plaws ces lub koom txoos Garma yog ib lub koom txoos uas tham txog tej zejzog, tej laj fai kum xeeb thiab tej pib puag ncig ntau yam uas cuam tshuam nrog neeg txum tim tej zejzog.
Lub koom txoos Garma Festival pib li cas?
Tau muaj ob kwv tij uas yog Dr Yunupingu AC uas yog Yothu Yindi tus neeg nqua yas suab nto npe, thiab Dr M Yunupingu tau teeb tsa xyoo 1999, thiab khwv tau lub tswv yim tias yuav tsim tsa lub koom tsoos no coj los ceev txuag, pov puag thiab txhawb nqa neeg txum tim Yolŋu tej kab lis kev cai.
Lub caij ntawd ces tej laus neeg ntawm tej zejzog kuj tau muaj cov kev txhawj xeeb tseem ceeb tias tsam tej txuj ci kab lis kev cai yuav plam thiab ploj mus. Ces thiaj tau teeb tsam lub koom txoos Garma coj los ua thaj chaw coj los txhawb nqa tej kab lis kev cai, coj los tham txog tej laj fai kum xeeb thaum tej neeg tau mus sib sau ua ke.
"Lub hom phiaj ces yog xyuas kom muaj txoj kev sib cuag tau rau ntau cov kab lis kev cai uas muaj cov kev sib tu ncua thiab siv cov kev sab laj sib tham los txhawb nqa neeg txum tim tej zejzog thiab ua kev zoo siab rau neeg txum tim Yolŋu tej kab lis kev cai,” raws li John-Paul Janke uas yog SBS tus National Indigenous Affairs Editor thiab tus tswv cuab koom tswj cov xov xwm The Point ntawm NITV hais.
Ua lub koom txoos Garma Festival ntawm qhov chaw twg?
Lub koom txoos no ces ua ntawm Gulkula, uas yeej ib txwm yog thaj chaw uas tsib (5) cheeb tsam neeg txum tim tej xeem nyob ntawm sab qaum teb hnub tuaj ntawm Arnhem Land li: the Gumatj, Rirratjingu, Djapu, Galpu and Wangurri siv ua chaw sib ntsib.
Yog tham rau cov neeg txum tim xeem Gumatj, ces Gulkula yog ib thaj chaw ua kab lis kev cai tseem ceeb heev.
Tej neeg txum tim Yolŋu tej kab lis kev cai ces Gulkula yog thaj chaw uas lawv ib tug poj koob yawm koob (Ganbulapula) uas lawv ntseeg tias yog tus coj lub raj ntoo tshuab ua suab paj nruag hu ua Yidaki (uas sawv daws paub tias yog didgeridoo) los rau cov neeg Yolŋu.
Niaj hnub no ces yeej tseem siv thaj chaw Gulkula ua lub koom txoos Garma no txuas ntxiv ib xyoos ib zaug kom tej neeg tau mus sib ntsib.
Vim li cas lub koom txoos Garma Festival thiaj tseem ceeb?
Tanya Denning-Orman, ces yog SBS tus coj uas tswj cov hauj lwm First Nations hais tias Garma ces yeej txawm lawm cov koom txoos lwm yam hauv ntiaj teb.
"Garma ces nws yeej txawv thiab nyob rau ib qho chaw txawv... tab sis tej neeg kuj mus sib ntsib rau ntawm thaj chaw no thiab. Yeej yog ib thaj chaw sib ntsib los tau ntau pua xyoo, thiab muaj hom phiaj los txhawb nqa kom tej mus mus koom sib tham koom tes, tham txog tej laj fai kum xeeb thiab tham txog lawm yam."
Lub koom txoos Garma Festival raug txim coj los pov puag neeg txum tim Yolŋu tej txuj ci kab lis kev cai, ua ke no los kuj ua kev zoo siab rau neeg txum tim cov kev muaj peev xwm thiab cov kev nyiaj ntxeem.
Cov kev ua lub koom txoos Garma no ntawm neeg txum tim Yolŋu lub teb chaws thiaj yog tej yam tseem ceeb heev rau lub koom txoos no vim tej qhua kawm kom paub txog thaj chaw no uas yeej tau qhia tej txuj ci kab lis kev cai rau ntau phaum neeg los tau ntau txheeb xyoo lawm.
Tsis tas li no los kuj yog ib thaj chaw uas tej neeg ntau yam sib txawv los yeej muaj peev xwm tham txog tej kab lis kev cai yam tsis tas txhawj dab tsi thiab sib cog qhia sib cog kawm ua ke ntawm ib tug twg.
Yog tham rau tej neeg feem coob lawm ces lub koom txoos no yuav yog lawv thawj cov cib fim yuav tau siv caij mus xyuas lub teb chaws no thiab kawm ncaj qha ntawm tej tswv teb chaws (Traditional Custodians).
Ua kev nrog rau tej program qhia tej kab lis kev cai no kuj muaj cov kev sab laj sib tham txog zej tsoom tej cai uas cuam tshuam txog Australia tej neeg txum tim Aboriginal thiab Torres Strait Islander thiab. Tej no thiaj pab kom neeg txum tim tej coj ua co los taw qhia rau cov kev sib tham no nrog tej nom tswv uas paub tej kab lis kev cai, uas yog ib qho tseem ceeb heev ntawm cov kev muaj peev xwm los ua tus txiav txim siab rau yus txoj kev ua lub neej.
Cov kev tau txais kev twj lij ywj pheej thiab ua tau lub neej li qhov yus xav ua yog ib co txheej txheej yuav tau ua ua ntuv zus kom neeg txum tim muaj feem koom ncaj qha rau ntau cov kev txiav txim siab txog ntau yam uas yuav ua rau muaj kev cuam tshuam rau lawv.
Leej twg koom lub koom txoos Garma Festival?
Tseem muaj ib co kev totaub yuam kev tias tsuas yog tej neeg raug caw nkaus xwb mas thiaj mus koom tau lub koom txoos Garma Festival no xwb.
Denise Bowden uas yog tus coj lub koom haum Yothu Yindi Foundation hais tias ib tug twg yeej muaj peev xwm yuav tau yuaj (pib - ticket) ntawm lub koom haum Yothu Yindi Foundation lub vas sab ces yeej muaj peev xwm mus koom tau.
"Lub koom haum Yothu Yindi Foundation no yeej tswj lub koom txoos no uas yeej muaj cov kev sponsor thiab tej neeg kuj yuav tej yuaj (pib -ticket) thiab tej nyiaj tau no kuj rov qab coj mus pab rau tej neeg ntawm peb cheeb tsam no. Tsis hais pab rau tej artists uas koom peb lub koom txoos."
Lub koom haum no yeej caws tej nom tswv txhuag tog mus koom, thiab ntau xyoo dhau los, Australia tus thawj pwm tsav yeej tau mus koom.
Yeej muaj tej neeg teeb txheeb (researchers), tej neeg txawj txeeg txuj (educators), ntau pab pawg neeg advocates, artists thiab zej zog tej koom haum los yeej mus koom thiab, ces thiaj ua rau lub koom txoos Garma yog ib thaj chaw uas muaj tej neeg ntau yam muaj peev xwm sib pauv hloov tswv yim, tsim kev sib koom tes thiab sab laj txog tej cai ntau yam.
Ua dab tsi ntawm lub koom txoos Garma Festival?
Koom txoos Garma pab kom tej neeg muaj cib fim totaub zoo tshaj qub ntxiv txog ntiaj teb tej kab lis kev cai qub tshaj plaws.
Nruab hnub ces kuj muaj tej cultural worshops, uas pab kom tej qhua tau lawm kab lis kev cai nrog tej laus neeg uas yog neeg txum tim Yolŋu tej coj tham txog lawv cov lus Yolŋu Matha, tham txog cov kev sib txheeb (kinship systems), art, nkauj (yas suab) thiab lwm yam.
Thaum hnub poob ces ua lub koom txoos seev cev bunggul nrog yidaki (didgeridoo), bilma (clapsticks) thiab neeg txum tim Yolŋu tus txiv neej hu nkauj. Thiab yuav muaj ntau tsav neeg txum tim uas muaj tej xeem sib txawv los seev cev qhia txog lawv tej dab neeg.
Tab sis qhov tseem ceeb xav kom koj nco ntawm lub koom txoos Garma no ces tseem tseem ceeb tshaj cov kev ua koom txoos kab lis kev cai lawm.
Vim yog ib lub cib fim pab kom tej neeg tau sib tham thiab sib peev theev txog ntau yamt seem ceeb uas tau muaj teeb meem rau neeg txum tim Yolŋu thiab lwm cov neeg txum tim thoob teb chaws Australia no.
Lub caij tseem ua lub koom txoos no muaj 2 lub rooj sab laj tshwm sim uas yog:
- Key Forum: Ces yog lub rooj sab laj uas tej coj ntawm tej neeg Australia uas tsis yog neeg txum tim thiab tej coj ntawm tej neeg Australia uas yog neeg txum tim tham txog tej cai, thiab sab laj txog nta yam raws li sob lus siv ntawm lub koom txoos Garma xyoo ntawd.
- Youth Forum: Ces yog lub rooj sab laj rau tej me nyuam yaus txij 8-18 xyoo thoob teb chaws mus sib ntsib thiab ua ntau yam activities thiab workshops uas muaj hom phiaj sib faib tej txuj ci.
Tej cultural activities thiab tej kev sib tham no thiaj yog tej yam ua rau lub koom txoos Garma yog ib lub koom txoos txawv uas tej neeg mus sib ntsib sib sau tham txog, kawm txog tej kab lis kev cai thiab sib faib tej txuj ci, thiab sib pauv hloov tswv yim ntawm tej coj uas tau mus sib ntsib.
Subcribe los yog caum mloog tej xov xwm kaw ua suab Australia Explained kom paub txog ntau yam xov xwm tseem ceeb thiab tej lus taw qhia koj koj pib tau lub neej tshiab ntawm teb chaws Australia.
Yog tias koj muaj ib co lus nug dab tsi los yog muaj ib co tswv yim dab tsi? Ces xa email rau peb rau ntawm australiaexplained@sbs.com.au
Mloog tau xov xwm tshiab ntawm SBS Hmong, download SBS Adio app, caum SBS Hmong ntawm Facebook,mloog tau Youtube, Spotify, Podfollow, iHeart Radio, Google Podcast thiab Apple Podcast.
