ඔස්ට්රේලියාවේ ප්රධානතම නිවාස වෙළෙඳ පොළ ද්විත්වය වන සිඩ්නි සහ මෙල්බර්න් නිවාස වෙළෙඳ පොළ මිල ගණන් නැවතත් ඉහළ නගිමින් පවතින බව වාර්තා වේ.
SBS සිංහල සේවය සඳුදා, අඟහරුවාදා, බ්රහස්පතින්දා, සිකුරාදා පෙ.ව 11 සිට 12 දක්වා (ඕස්ට්රේලියානු වේලාවෙන්)
සජීවීවසහපසුව online අහන්න - www.sbs.com.au/sinhalese
SBS Radio APP එකෙන් (Free download)
පසුගිය කාලය පුරාවට සිඩ්නි සහ මෙල්බර්න් නිවාස වෙළෙඳ පොළ මෙන්ම ඔස්ට්රේලියාවේ ජාතික නිවාස වෙළෙඳ පොළ මිල ගණන් පසුබෑමකට ලක්විය.
සිඩ්නි සහ මෙල්බර්න් නිවාස වෙළෙඳ පොළ
පසුගිය අගෝස්තු මාසයේදී සිඩ්නි නිවාස වල මිල 1.5% කින් ඉහළ ගොස් ඇති බවත් පසුගිය මාස තුන ඇතුළත එම නැග්ම 1.6% ක් බවත් නවතම CoreLogic වාර්තාව පෙන්වා දෙයි.
එමෙන්ම මෙල්බර්න් නිවාස වල මිල පසුගිය අගෝස්තු මාසයේදී 1.3% කින් ඉහළ ගොස් ඇති බවත් පසුගිය මාස තුන ඇතුළත එම නැග්ම 1.6% ක් බවත් සඳහන්.
මේ අතර Unit මාදිලියේ නිවාස වල මිල ගණන් ද සිඩ්නි සහ මෙල්බර්න් නිවාස වෙළෙඳ පොළේ ඉහළ ගොස් ඇති බව වාර්තා වේ.
ඒ අනුව පසුගිය අගෝස්තු මාසයේදී සිඩ්නි Unit මාදිලියේ නිවාස වල මිල 1.8% කින් ඉහළ ගොස් ඇති බවත් පසුගිය මාස තුන ඇතුළත එම නැග්ම 2.5% ක් බවත් නවතම CoreLogic වාර්තාව පෙන්වා දෙයි.
මෙල්බර්න් Unit මාදිලියේ නිවාස වල මිල පසුගිය අගෝස්තු මාසයේදී 1.5% කින් ඉහළ ගොස් ඇති බවත් පසුගිය මාස තුන ඇතුළත එම නැග්ම 2.4% ක් බවත් සඳහන්.
නිවාස මිල නැවත ඉහළ නැගීමට හේතු
සිඩ්නි සහ මෙල්බර්න් නිවාස වෙළෙඳ පොළ මිල ගණන් නැවත ඉහළ නැගීමට ප්රධානතම හේතු කිහිපයක් ඇති බව CoreLogic ආයතනයේ පර්යේෂණ අධ්යක්ෂ Tim Lawless, The Age පුවත් පතට පවසා තිබේ.
ඔස්ට්රේලියානු මධ්යම බැංකුව පසුගිය කාලයේදී නොකඩවා දෙවරක් පොලී අනුපාතික කප්පාදු කිරීම ඊට ප්රධානතම හේතුව ලෙස සැලකීමට හැකි බව ඔහු පෙන්වා දෙයි.
මේ වන විට ඔස්ට්රේලියාවේ පොළී අනුපාතික මට්ටම 1% මට්ටමේ පවතින අතර එය මෑත ඉතිහාසයේ වාර්තාවූ පහළම මට්ටම වේ.
ඊට අමතරව නිවාස ගැණුම්කරුවන්ගේ ඉහළ ඉල්ලුමද මේ සඳහා බලපෑ බව ඔහු සඳහන් කරයි.
එයට සිඩ්නි සහ මෙල්බර්න් නිවාස වෙළෙඳ පොළ පිළිබඳ ගැණුම්කරුවන් තුළ ඇතිවූ විශ්වාසවන්තභාවය ප්රබල සාධකයක් වූ බව සඳහන්.
එමෙන්ම මෙවර අය වැයෙන් මොරිසන් රජය ඉදිරිපත් කළ ඒක පුද්ගල ආදායම් බදු කප්පාදුව ද මෙලෙස සිඩ්නි සහ මෙල්බර්න් නිවාස වෙළෙඳ පොළ මිල ගණන් නැවත ඉහළ නැගීමට ප්රධානතම හේතුවක් වන්නට ඇතැයි CoreLogic ආයතනයේ පර්යේෂණ අධ්යක්ෂ Tim Lawless අනුමාන කරයි.
සාපේක්ෂව ගත් කළ සිඩ්නි සහ මෙල්බර්න් නිවාස මිළ ගණන් වල බැස්මක්
පසුගිය කාර්තුව හැරුණුකොට සාපේක්ෂව ගත් කළ සිඩ්නි සහ මෙල්බර්න් නිවාස මිළ ගණන් වල තවමත් බැස්මක් ඇති බවද CoreLogic ආයතනයේ දත්ත පෙන්වා දෙයි.
පසුගිය වසරේ අගෝස්තු මාසයේ සිට බලන කල සිඩ්නි නිවාස මිල ගණන් 7.7% කින්ද මෙල්බර්න් නිවාස මිල ගණන් 8.7% කින්ද පහත බැස තිබේ.
ඒ අනුව ඔස්ට්රේලියාවේ ප්රධාන නිවාස වෙළෙඳ පොළ මිළ ගණන් වල නැවත නැග්මක් පෙන්නුම් කළද බොහෝ දුරට එය මන්දගාමී නැග්මක් වනු ඇතැයි නිවාස හා දේපළ වෙළෙඳාම් ක්ෂේත්රයේ ප්රවීණයෝ විශ්වාස කරති.
