اہم نکات
- تحریک انصاف کا سینیٹ انتخابات کا بائیکاٹ
- صحافیوں پر تشدد کا مقدمہ درج
- پاکستان میں سیلاب سے وسیع تباہی
پاکستان تحریک انصاف نے پنجاب سے سینیٹ کی جنرل نشست پر انتخابات کا بائیکاٹ کردیا۔ مسلم لیگ ن کے رہنما رانا ثنا اللہ 250 ووٹ لے کر سینیٹر منتخب ہوگئے۔ تحریک انصاف نے اعجاز چوہدری کی اہلیہ سلمی اعجاز کو نامزد کیا لیکن ووٹنگ کے عمل میں حصہ نہیں لیا۔ سینیٹ کی یہ نشست پاکستان تحریک انصاف کے رہنما سینیٹر اعجازچوہدری کی نااہلی کے بعد خالی ہوئی تھی۔ رانا ثنا اللہ کی جیت کے بعد سینیٹ میں مسلم لیگ ن کی نشستون کی تعداد 21 نشستیں ہو گئی ہے۔
راولپنڈی پولیس نے اڈیالہ جیل کے باہر علیمہ خان کی پریس کانفرنس کے دوران پی ٹی آئی کارکنان کی جانب سے طیب بلوچ، یاسر حکیم اور دیگر صحافیوں پر تشدد کا مقدمہ درج کرلیا ہے۔ مقدمے میں سابق وزیراعظم عمران خان کی ہمشیرہ علیمہ خان ، نعیم حیدر پنچوتھا اور 40 نامعلوم افراد کو نامزد کیا گیا ہے۔ انسداد دہشتگردی کی عدالت نے موقع سے گرفتار دو ملزمان کو شناخت پریڈ کیلئے جیل بھیج دیا ہے۔ ادھر صحافیوں پر تشدد کیخلاف صحافتی تنظیموں نے احتجاجی مظاہرے کیے ہیں۔
دریائے راوی، ستلج اور چناب میں آنیوالے اونچے درجے کے سیلاب نے پاکستان کے صوبہ پنجاب اور سندھ میں تباہی مچا دی ہے۔ پنجاب حکومت کے مطابق تاریخ کے بدترین سیلاب سے 4300 دیہات میں 42 لاکھ سے زائد لوگ متاثر ہوئے ہیں۔ ریسکیو آپریشنز کے ذریعے 21 لاکھ سے زائد افراد کو محفوظ مقامات پر منتقل کیا گیا ہے۔ سیلاب سے ہزاروں ایکڑ پر کھڑی فصلیں بھی متاثر ہوئی ہیں۔ سیلابی ریلوں کے باعث ملتان، مظفرگڑھ اور دیگر اضلاع سب سے زیادہ خطرے میں ہیں۔ سندھ میں بھی سہیون اور کچے کے علاقوں سے شہریوں کی منتقلی جاری ہے۔ بھارت نے ایک بار پھر دریائے ستلج میں سیلاب کی وارننگ جاری کردی ہے۔ بھارتی ہائی کمیشن کے مطابق ہریکے اور فریزوپور میں اونچے درجے کا سیلاب ہے۔
(بشکریہ: اصغرحیات۔ پاکستان)
____
جانئے کس طرح ایس بی ایس اردو کے مرکزی صفحے کو بُک مارک کریں ہر بدھ اور جمعہ کا پورا پروگرام اس لنک پرسنئے, اردو پرگرام سننے کے دیگر طریقے, “SBS Audio”کےنام سےموجود ہماری موبائیل ایپ ایپیل (آئی فون) یااینڈرائیڈ , ڈیوائیسزپرانسٹال کیجئے۔
