Ntsiab lus:
- Yeej muaj ntau cov kev pab cuam tim ntsej tim puag thiab muaj tsoom fwv ntau yam xov xwm pab kom kom muaj peev xwm txheeb txog cov kev pauv hloov ua dua ib txoj hauj lwm tshiab.
- Tej neeg tsiv teb tsaws chaw yeej muaj ntau yam kev txawj ntse thiab txuj ci pab rau tej chaw ua hauj lwm, tab sis tej zaum lawv kuj yuav tau mus xyaum dua tshiab los yog kawm kom paub ua tej hauj lwm ntawm teb chaws Australia no yog xav ua ib co hauj lwm twg tsi ntsees.
- Cov kev muaj peev xwm siv cov AI (Artificial Intelligence) yog ib co uas tej kiab khw ntiav dag zog xav tau heev tam sim no.
- Australia tej neeg ua hauj lwm hloov lawv tej hauj lwm npaum li cas?
- Tsam ib pliag kuv laus dhau lawm los yog tsis muaj tej txuj ci paub ua txoj hauj lwm tshiab?
- Kuv muaj peev xwm nrhiav tau tej xov xwm thiab tej kev taw qhia ntawm qhov twg txog cov kev hloov ua ib txoj hauj lwm tshiab ntawm teb chaws Australia?
- Australia tej kiab khw ntiav neeg ua hauj lwm zoo li cas tam sim no thiab yav pem suab?
- Kuv yuav paub li cas tias txog caij tso tseg tsis ua ib txoj hauj lwm twg lawm?
Cov kev pib ua ib txoj hauj lwm tshiab yog tej yam ua rau yus ntshai thiab yus txhawj heev.
Tab sis tej kws hais tias tej zaum kuj yuav yog tej yam pab kom tsim tau ib co cib fim tshiab rau yus thiab.
Australia tej neeg ua hauj lwm hloov lawv tej hauj lwm npaum li cas?
Cov kev hloov ua dua ib co hauj lwm tshiab yeej tsis yog tej yam txawv dab tsi ntawm Australia. Raws li ABS tej xov xwm tshiab qhia, ces yeej muaj tej neeg ua hauj lwm ntau tshaj 1 million tus tau hloov ua dua hauj lwm tshiab rau lub caij 2 hlis ntuj xyoo 2025 txog rau lub 2 hlis ntuj xyoo 2025.
Txawm tsis tshua muaj tej xov xwm ntxaws qhia kiag tias ho muaj ocv kev pauv hloov ua hauj lwm li cas kiag los raws li tau muaj ib co kev teeb txheeb xyoo 2024 survey qhia ces yeej muaj ib tug ntawm ob tug neeg ua hauj lwm neeg Australia ua hauj lwm yeej xav pauv hloov ua dua ib txoj hauj lwm tshiab.
Alice Cheng uas yog ib tug neeg pab lwm tus npaj thiab nrhiav hauj lwm ua hais tias "Cov kev hloov ua hauj lwm tshiab yeej yog ib co pom muaj tas mus li lawm."
Tsam ib pliag kuv laus dhau lawm los yog tsis muaj tej txuj ci paub ua txoj hauj lwm tshiab?
Tej hluas hnoob nyoog 20 tawm xyoo yog cov uas yeej xav hloov ua dua cov hauj lwm tshiab, vim lawv tseem xyaum kom lawv muaj tej txuj ci paub ua hauj lwm thiab tseem txheeb tias yuav ua hauj lwm li cas, ua lub neej li cas kom thiaj ua tau lub neej tiav raws li siab xav.
Tab sis raws li Ms Cheng hais ces tag nrho tej neeg ua lub neej ntawm txhua theem neej yeej yuav tau npaj kom thiaj muaj peev xwm hloov mus ua tau ib txoj hauj lwm tshiab.
Nws hais tias "Thaum yus muaj hnoob nyoog 40 tawm xyoo ces yus yeej muaj kev ntseeg yus tus kheej ntau tuaj ntxiv, vim yus paub tseeb kiag tias yus xav tau dab tsi, dab tsi ua rau yus qaug zog thiab dab tsi txhawb yus.
“In your 40s, this is where you get more confident with yourself knowing exactly what you want, what drains you, what energises you.
"Thaum yus muaj 50 tawm xyoo lawm ces yus cov kev ua hauj lwm zoo tam li lub hnub uas twb yuav poob qho lawm, thiaj txog caij uas yuav tau txiav txim siab tias seb yus puas tseem xav ua txoj hauj lwm uas tseem tab tom ua tam sim no txuas ntxiv los sis yuav ua dua ib txoj tshiab rau lub sij hawm 10 los sis 15 xyoos ntxiv no."
Tsuas nyob ntawm seb yus ua hom hauj lwm ntawm tej lagluam dab tsi xwb, tej neeg tsiv teb tsaws chaw tuaj tshiab rau Australia no tej zaum kuj yuav tsis paub ua hauj lwm li tej neeg ntawm lub teb chaws no uas qee yam hauj lwm xav kom yus paub ua.
Tsuas yog tias ntshe yus ho kawm dua ib co hauj lwm tshiab xwb, tsis li ntawd ces yuav yuav tau los txheeb seb ho puas yuav siv tau ib co txuj ci uas yus muaj tam sim no los yog ib co kev paub ua hauj lwm tam sim no uas yus tau siv ua tej hauj lwm uas khwv tau nyiaj los yog tej hauj lwm uas ua pab lwm tus coj mus siv xwb.
Ms Cheng hais tias "Xav kom txheeb tias 'yus muaj peev xwm ua tau dab tsi zoo?', 'thiab ho muaj tej yam dab tsi uas yus muaj peev xwm ua tau ntxiv piv rau lwm tus neeg ntawm teb chaws no uas mus nrhiav hauj lwm ua?' thiab yuav tsum ua tib zoo sau yus daim ntawv resume kom zoo, thiab thaum mus interview los yuav tsum xyuas kom muaj kev ntseeg yus tus kheej ... thiab tsis txhob ntshai txawm tias lawv tsis muab txoj hauj lwm ntawd rau yus ua."
Thiab yog yus xav tias yus cov kev hais lus Askiv tsis meej yuav ua rau muaj teeb meem rau yus, ces xav kom tsuas kub siab txog qhov tias seb yus muaj peev xwm dab tsi los ua tau txoj hauj lwm tshiab ntawd xwb.
Kuv xav qhia kom nej muaj kev tso siab tias tej neeg ntau puas tus uas kuv tau taw qhia uas yeej hais lus Askiv ua hom lus ob xwb, pheej xav tias ntshe cov kev tsis paub lus Askiv zoo yuav ua rau muaj teeb meem rau lawv, tab sis tsuas yog lawv lam xav xwb.Alice Cheng
Thiab nws yeej hais tias tej neeg feem coob ntawm Australia niaj hnub no yeej hais tej suab lus Askiv tsis meej.
Kuv muaj peev xwm nrhiav tau tej xov xwm thiab tej kev taw qhia ntawm qhov twg txog cov kev hloov ua ib txoj hauj lwm tshiab ntawm teb chaws Australia?
Yog koj xav tau xov xwm thiab kev pab cuam txog tej xub ke pab kom koj kawm tau ib co txuj ci tshiab los yog kawm ua dua ib co hauj lwm tshiab los sis seb ho muaj tej hauj lwm dab tsi rau koj ua ntawm tej chaw koj nyob, ces xav kom mus txheeb tej nom tswv xeev tej vassab (Websites) raws li hauv qab no:
Victoria; Western Australia; New South Wales; Queensland; Tasmania; Northern Territory; Australian Capital Territory; thiab South Australia.
Tsis tas li ntawd los koj yeej muaj peev xwm mus txheeb au lub vassab workforceaustralia.gov.au kom siv tau ib co twj hu ua Job Switch tool (Cov twj pab hloov hauj lwm) pab koj txheeb tej xub ke nrhiav hauj lwm uas haum raws li koj tej txuj ci thiab tej qualifications tam sim no.
Yog tias koj muaj hnoob nyoog 45 xyoos los yog siab tshaj ntawd lawm, ces xav kom koj txheeb cov kev pab cuam hu ua Career Transition Assistance program.
Muaj ib txhia xeev li Victoria thiab Western Australia ces yeej muaj ntau cov chaw ua hauj lwm uas pab ntau yam tsis hais muaj cov kev qhia txog tej hauj lwm, xyaum yus kom paub ua ib yam hauj lwm dab tsi, thiab yeej muaj cov kev pab yus mus nrhiav hauj lwm ua.
Craig Robertson ces yog tus CEO ntawm lub koom haum Victorian Skills Authority (VSA).
Lub koom haum no yeej tswj ntau cov chaw uas qhia tej txuj ci thiab qhia txog tej hauj lwm ntau yam ntawm tej chaw qhia ntawv TAFE thoob plaws lub xeev no.
Mr Robertson hasi tias "Yeej muaj tej kev pab cuam no pab rau zej tsoom sawv daws thiab."
"Thiab vim tias tej chaw no ua ntawm tej zejzog, ces lawv thiaj paub zoo txog tej hauj lwm ntawm ib cheeb tsam twg ... thiab yeej muaj tej neeg paub zoo txog ntau yam hauj lwm uas muaj peev xwm taw qhia txog tej hauj lwm rau ib tug twg tau ywj pheej yam tsis nce rau ib tug twg."
Hos yog tias yus xav paub txog Australia tej kiab khw ntiav thiab nrhiav neeg ua hauj lwm, ces Mr Robertson taw qhia kom siv cov twj ntawm tsoom fwv lub vassab yourcareer.gov.au.
Nws hais tias "Yog ib co online search engine uas yus muaj peev xwm nug tau ntau cov lus nug txog ntau yam txog cov kev hloov ua dua hauj lwm tshiab."
Thiab yuav muaj tej xov xwm li hauv qab no qhia rau yus:
- Qhias tias seb yus puas muaj cib fim yuav nrhiav tau hauj lwm ua?
- Qhia tias seb hom hauj lwm ntawd them nyiaj hauj lwm zoo li cas?
- Thiab seb yus puas yuav tau mus kawm ib co sob kawm npaj kom yus thiaj muaj txuj ci paub ua tau ib co hauj lwm dab tsi?
Australia tej kiab khw ntiav neeg ua hauj lwm zoo li cas tam sim no thiab yav pem suab?
Yog xav mus kawm ib co txuj ci tshiab kom yus muaj peev xwm mus nrhiav tau hauj lwm ntawm Australia tej kiab khw nrhiav thiab ntiav neeg ua hauj lwm ces xav kom mus kawm cov txuj artificial intelligence.
Dr Caroline Knight uas yog ib tug lees kais qhia ntawv ntawm tsev kawm qib siab University of Queensland lub teej kawm qhia txog lagluam hais tias "Tej lagluam yeej xav tau tej neeg uas uas paub siv tej txuj AI."
Thiab Dr Knight tseem hais ntxiv tias tam sim no ces yeej tau hloov cov kev ua hauj lwm uas ua ntawm tsev thiab ua ntawm tej chaw ua hauj lwm ua ke li no mus lawm.
Kuj tau muaj cov kev pauv hloov tej kab li kev cai ua hauj lwm lawm vim tej technology zoo tuaj ntxiv thiab muaj peev xwm tswj tau kev ruaj ntseg zoo tuaj ntxiv ces thiaj pab kom peb muaj peev xwm ua tau hauj lwm ntawm tsev yooj yim dua lawm.Dr Caroline Knight
Tab sis tej neeg ua hauj lwm tseem ceeb ntau yam (Frontline workers) li neeg kho mob, lees kais, neeg ua hauj lwm tswj tej xwm txheej ti tes ti taw, tej neeg ua hauj lwm ntawm tej kiab khw, thauj khoom xa khoom ces yog cov yuav tau mus ua kiag ntawm chaw xwb.
Dr Knight hais tias "Tab sis tej lagluam feem coob, ces yeej muaj ib co hauj lwm uas tej neeg muaj peev xwm ua tau ntawm tsev thiab."
Kuv yuav paub li cas tias txog caij tso tseg tsis ua ib txoj hauj lwm twg lawm?
Tsis yog txhua tus yuav txiav txim sib hloov ua dua hauj lwm tshiab kom tau ua ntau yam tshiab thiab kom tau tej paj tshab zoo dua.
Muaj ib txhia tos ho hloov ua dua hauj lwm tshiab los lawv xav tsiv tawm ntawm tej xwm txheej tsis zoo, tej chaw ua hauj lwm ua muaj teeb meem, los sis tso tseg tej hauj lwm uas ua rau lawv qaug zog.
Dr Knight thiaj hais tias tsuas yog yus tus kheej thiaj muaj peev xwm qhia tau rau yus tias puas yog lub caij tsim nyog yus hloov ua dua ib txoj hauj lwm tshiab lawm xwb.
Tej thaum ces kuj yuav yog tej yam zoo tshaj plaws uas xub nrog yus tus manager tham thiab sab laj txog ib yam teeb meem uas yus tab tom ntsib ua ntej tso.
Nws hais tias "Kuj yog tej yam txaus tu siab uas ua rau yus tsis tau ua txoj hauj lwm yus nyiam ua, vim tej zaum txoj hauj lwm ntawd ua rau yus qaug zog dhau lawm, uas ua rau yus tsis xav poob rau tej chaw ua hauj lwm ntawv ntxiv lawm.
"Tab sis yog yus mloog tias yus tsis nyiam txoj hauj lwm ntawd, ces yog ib lub zoo tswv yim uas yuav tau hloov mus ua dua ib txoj hauj lwm tshiab lawm."
Subcribe los yog caum mloog tej xov xwm kaw ua suab Australia Explained kom paub txog ntau yam xov xwm tseem ceeb thiab tej lus taw qhia koj koj pib tau lub neej tshiab ntawm teb chaws Australia.
Yog tias koj muaj ib co lus nug dab tsi los yog muaj ib co tswv yim dab tsi? Ces xa email rau peb rau ntawm australiaexplained@sbs.com.au
Mloog tau xov xwm tshiab ntawm SBS Hmong, download SBS Adio app thiab caum SBS Hmong Facebook page thiab mloog tau SBS Hmong Youtube.
