CiCi XaivKaubThoj hais tias "Kuv xav kom peb cov Hmoob yuav tsum paub txog hnub sib hlub (Valentine Day) thiab, vim yog ib hnub ua kev zoo siab rau tej txij nkawm los yog tej niam txiv kom sawv daws ho muaj kev lom zem thiab kev lam hlwb."
Txoj kev sib hlub mas tsis yog tias txog hnub Valentine es thiaj li sib hlub xwb, txoj kev sib hlub mas yuav tsum sib hlub txhua txhua hnub li od! tab sis mas Valentine no ces tsuas yog ib hnub sib hlub ntawm ib lub xyoo xwb.CiCi XaivKaubThoj
CiCi hais ntxiv tias ''Txoj kev sib hlub rau hnub Valentine no yog ib hnub tshwj xeeb heev (very special), rau qhov tias yeej muaj dab neeg thaum ub dhau los uas yog tsis sib yuav ces tsis pub nyob ua ke. Ces tus txiv plig Saint Valentine thiaj muab tej tub ntxhais no sib txi sib yuav ua txij nkawm ces nws thiaj raug teeb meem. Yog li ntawd ces sawv daws thiaj muab hnub no los ua Valentine Day."
Txuas ntxiv no yog Yeej Huam Vaj uas yog tus tuam thawj tswj lub koom haum Hmong Culture Brisbane Ince piav txog hnub Valentine Day tias muaj keeb kwm li cas. Mloog tau nws tej lus ntawm daim YouTube video no tau.
Cici hais ntxiv tias ''Kuv xav kom sawv daws txawm hnub Valentine Day no txawm tsis nco qab sib hlub kiag los, txog hnub no mas yuav tsum nco ntsoov hauv yus lub neej tias hnub Valentine Day no yog hnub sib hlub no nawb."
Txooj Cawv XaivKaubThoj uas yog tus tswv cuab tswj lub koom txoos Valenday Day party no hais tias ''Zoo siab uas sawv daws tuaj txhawb nqa lub koob tsheej no thiab vam thiab cia siab tias lwm xyoo yuav muaj tus los tswj txuas ntxiv thiab."
Vam Kub Muas hais tias ''Tam sim no tsis hais nyob qhov twg li yeej muaj lub koob tsheej Valentine lawm, tsis hais nyob qhov twg li. Yog muab hais ces Meskas lub xwb, tiam si peb tuaj nyob teb chaws no ces peb kuj ua li Meskas lawm thiab,'
"Hnub Valentine no yog ib hnub ua kev zoo siab rau txoj kev sib hlub, dhau qhov ntawd lawm los yog ib hnub peb sawv daws tuaj sib ntsib, coj poj niam tuaj ua kev lom zem, tuaj mloog nkauj ces yog ib hmo lom zem thiab,
Kuv yeej hais lus qab zib rau kuv tus hlub thawm niaj thawm xyoo li od! Tsis yog hnub no mam li hais xwb nawb. Peb ua neej nyob peb txhob tos ib xyoos 360 hnub es peb tsis hais tab sis hnub no peb mam li hais thiab peb mam hlub nws tsis yog li ntawd. Peb txoj kev sib hlub mas peb yuav tsum hlub ib xyoos ntuj zeeg 360 hnub. Peb yuav tsum hais lus zoo, ua zoo, koj ua zoo rau kuv, kuv ua zoo rau koj. Txog hnub no peb thiaj muaj siab tuaj ua ke tuaj ua kev zoo siab rau peb txoj kev hnub nas yom! Yog peb nyob tom tsev peb twb tsis sib hlub, peb yog yeeb ncuab xwb no es hnub no peb tuaj ua dab tsi nas? Mas kuv xav hais tias peb sib hlub txhob tos txog hnub no nawb, sib hlub txhua txhua hnub, koj hais lus zoo rau kuv, kuv hais lus zoo rau koj.Vam Kub Muas
Phas Yaj hais tias "Peb ua lub neej nyob ces sib hlub hauv lub siab xwb tsis txhob khav (show off) tsam nyob tsis ntev."
Nyiaj Tsu Thoj hais tias ''Kuv kuj xav tias yog ib qho zoo thiab. Peb tuaj nyob lub teb chaws no ces peb tuaj kawm lawv lub neej nyob teb chaws no lawm, peb yuav tau xyaum lub teb chaws no. Peb nyob teb chaws no Valentine Day no yog ib qho zoo rau cov nkawm niam txiv, cov hluas nkauj hluas nraug uas tseem nyuam qhuav sib ntsib, thiab yog ib hnub zoo rau lawv sawv daws thiab nawb."
Niam Nyiaj Txos Thoj hais tias ''Zoo siab hnub Valentine Day rau ib tsoom niam txiv kwv tej neeg tsa sawv daws nawb. Hnub no yog ib hnub sib hlub rau sawv daws."
Hawj Thoj hais tias ''Hnub no yog hnub Valentine thiab yog ib hnub zoo, tsis muaj dab tsi os, khwv khwv ib xyoos. Hnub no kuv xav kom kuv tus poj niam zoo siab thiab tus neeg yus hlub zoo siab xwb. ...(Lub suab poj niam Hmoob coob tus zoo siab luag zom zaws)...Ua txhua yam li nws nyiam tau hnub no. Kuv mam ua kom nws zoo siab xwb yom."
Nod yog cov lus yus yuav siv sib tham rau hnub Valentine Day. Muaj peev xwm kawm nrog SBS Learn English toom sob kawm nod tau ntawm no.
Mloog tau xov xwm tshiab ntawm SBS Hmong, download SBS Adio app thiab caum SBS Hmong Facebook page.
