Xov xwm luv tshaj tawm hnub zwj Feej (Wednesday news 04.03.2026):
Iran thiab Netanyahu
Benjamin Netanyahu hais tias Israel tseem yuav tawm tsam txuas ntxiv kom hnyav tshaj qub ntixv thiab yuav siv lub zog tub rog nruab ntug tawm tsam Iran thiab Lebanon txuas ntxiv. Nws hais tias Hezebollah cov kev tua Israel yog ib cov kev txiav txim siab yuam kev, vim ua rau neeg Lebanese yuav ua rog thiab.
Iran thiab Trump tej lus
Meskas tus thawj tsav meem (President) tsis lees tias Israel twb paub lub sij hawm uas Meskas yuav mus tua Iran lawm, thiab tuav lus ruaj tias Iran yuav tua nws ces nws thiaj xub tua Iran ua ntej. Thiaj ua rau muaj neeg tib Meskas tus tsoom fwv Trump tom qab nws tau koom nrog Israel tua Iran hnub zwj Cag (Saturday) dhau los uas tau ua rau Iran tus coj Ayatollah Ali Khamenei.
Iran thiab Trump thiab Askiv
Meskas tus thawj tsav meem Trump tau hais lus npau taws ntsuav rau Spain thiab Askiv (United Kingdom - UK) rau lawv cov kev tsis pab Meskas tua Iran ntawm Middle East, uas nws tau hawv tias yuav xaus tag nrho txhua cov kev ua luam nrog Spain vim lub teb chaws no thiab Askiv tsis kam lawv tej yeej tub rog rau Meskas siv. Tab sis txuas ntxiv los no Askiv kuj kam rau Meskas siv me ntsis tab sis kuj qhia meej tias tsuas pub siv raws qhov tsim nyog xwb. Vim ob lub teb chaws no tsis paub tseeb tias cov kev tua Iran puas ua raug cai.
Iran tej lus tawm tswv yim
Ali Bahreini uas yog Iran tus nom ntawm UN tau tsis pom zoo nrog Meskas cov kev tua nws tias ''yog ib co kev txiav txim siab ruam tshaj plaws'' vim ua rau muaj teeb meem rau cov kev sib khom txog nws cov nuclear program txuas ntxiv. Thiab nws qhia tias Iran yuav tawm tsam thiab tiv thaiv pov puag nws tus kheej txuas ntxiv.
Australia tsev neeg khuam daig ntawm Middle East
Tau muaj Michael Milton uas yog Australia tus neeg tseem yuav mus koom cov kev sib tw Milan-Cortina Paralympics ntawm Italy fij dav hlau uas twb ya tawm txog ib nrab kev raug yuam kom thim rov qab rau lub caij Meskas thiab Israel tua Iran.
Tej roj siv ntawm Australia
Chris Bowen uas yog Australia tus nom tswj tej dej num roj, gas thiab hluav taws xob hais tias tsis xav kom zej tsoom Australia ntshai es sib tw mus yuav roj ntau ntau ntawm tej chaw muag roj siv rau lub caij uas tseem muaj tsov rog ntawm teb chaws Iran. Nws hais tias Australia yeej muaj ntau yam roj (petrol, deisel thiab jet fuel) txaus siv tshaj ib lub hlis diam.
Tej xov xwm paim quav txog pab nom Liberal cov kev sib tw xaiv nom
Raws li tau muaj tej xov xwm paim quav uas txheeb txog pab nom Liberal Party cov kev txheeb txog nws pab nom cov kev npaj sib tw nrhiav suab xaiv nom ces pom tau tias nws tau ua ntau yam yuam kev, thiab tej coj uas txiav txim siab rau tej hauj lwm no los tsis kub siab los nrog xyuas tom qab tau muaj kev xaiv tsa tag kom muaj neeg nyiam nws pab nom.
Cov kev siv cov kev pab cuam pab neeg puas cev (National Disability Insurance Scheme - NDIS)
Raws li lub koom haum e61 Institute tau teeb txheeb txog tej plans ze txog 6,000 cov ces pom tias muaj ib tug ntawm peb tug neeg puas ces tsuas siv cov kev pab cuam NDIS tsawg dua ib nrab xwb (58%), ces thiaj ua rau muaj tej lus nug ntau yam tias cov kev siv nyiaj ntau billion dollars mus tsim cov kev pab cuam no puas pab tau raws li tej neeg xav tau siv tiag.
Afghanistan thiab Pakistan cov kev sib tua
Tau muaj cov kev sib tua raws ciam teb Afghanistan thiab Pakistan rau hnub 5 lawm uas tau ua rau 67 tus tub rog Afghan raug tua tuag thiab ib tug tub rog Pakistani tau tas sim neej, tom qab as Afghanistan tau tua pauj Pakistan cov kev siv dav hlau tua rog tua tej tub rog ntawm ciam teb Afghanistan ces thiaj ua rau Pakistan qhia tias nws ua rog nrog Afghanistan.
Cob tsib tej tsheb siv hluav taws xob
Tuoitre News tau qhia tias Cob tsib lub tuam txhab VinFast kuj tau tsim tau 3 hom tsheb siv hluav taws xob luxury muag ntawm nws lub teb chaws.
Roj siv thiab nyiaj them se
Vientiane Times tau tshaj tawm tias nom tswv Nplog tau qhia meej tias Nplog yeej muaj roj txaus siv rau lub caij tseem ua tsov rog ntawm Iran. Ua ke no los kuj hia tias lub tuam txhab Lanexang Mining kuj tau them se tshaj USD$ 11 million rau tsoom fwv xeev Savanakhet.
Cov kev xyaum tug rog Cobra Gold Military drill
Raws li Bangkok Post tau tshaj tawm ces Cambodia cov kev tsis mus koom cov kev xyaum tub rog Cobra Gold Military drill ntawm cheeb tsam Asia yog tej yam qhia txog cov kev tsis muaj kev sib ntseeg siab ntawm Thaib thiab Cambodia raws li tej kws paub tshuaj ntsuam txog tej xwm txheej no tau qhia.
Mloog tau xov xwm tshiab ntawm SBS Hmong, download SBS Adio app thiab caum SBS Hmong Facebook page.
