विश्वभर खोपलाई लिएर समावेशी खोप नीति लागु गर्ने प्रयास भएता पनि भाइरसबाट सबैलाई सुरक्षित राख्नका लागि अझै बढी कामको आवश्यकता रहेको रिपोर्टमा औँल्याइएको छ।
उक्त रिपोर्टकी लेखिका निकोल होग्लन्ड आप्रवासी र शरणार्थीहरू समावेश भएको देखिएता पनि वास्तविकता उनीहरूले अवरोध अनुभव गरिरहेको बताउँछिन् ।
साथै अन्य विषयहरूमा सीमित खोप आपूर्ति र जटिल दर्ता प्रक्रिया रहेको पनि उनको भनाई छ ।
उक्त संस्थाले ५२ देशमा गरेको सर्वेक्षणको तथ्याङ्कमा आधारित यो प्रतिवेदनलाई विश्वव्यापी तस्बिर मान्न सकिन्छ ।
अस्ट्रेलियन रेड क्रस अन्तर्गतको आप्रवासी सहयोग सम्बन्धी कार्यक्रमका प्रमुख भिकी माउ तथ्याङ्कले खोप कार्यक्रमको समावेशी पहुँचको सकारात्मक पक्षलाई केलाएको बताउँछिन् ।
होग्लन्डका अनुसार कोभिड–१९ विरुद्धको प्रतिक्रियालाई पूर्ण रूपमा समावेशी भएको सुनिश्चित गर्न मानिसहरूसँग कुरा गर्न जरुरी रहेको छ ।
उता, स्थानीय सङ्घ सङ्गठन भने आप्रवासी र शरणार्थी समुदाय नछुटुन् भन्ने उद्देश्यले,सूचनाको पहुँचमा भएको अन्तरलाई पहिचान गरी यसलाई कम गर्ने प्रयास गरी रहेका छन् ।
क्विन्सल्याण्ड अफ्रिकन कम्युनिटी काउन्सिलका बेनी बोल राज्यका ९५ प्रतिशत अफ्रिकन भाषा बोल्ने मानिससँग अनुवादकसम्मको पहुँच नरहेको दाबी गर्छन् ।
उनी भन्छन् कि क्विन्सल्यान्डका अधिकांश अफ्रिकन समुदायका मानिस माझ सूचनाको सेवा पुगेको छैन ।
बोल रेडक्रस, राज्यको शरणार्थी स्वास्थ्य सञ्जाल र सांस्कृतिक र भाषिक स्वास्थ्य सहभागिता परियोजनासँग पनि सम्बन्धित भएर काम गर्छन् ।
उनी भन्छन् यो समुदायको निराशाहरू बाँड्न महत्त्वपूर्ण मञ्च मात्र होइन शरणार्थी र आप्रवासीहरू सम्म पुग्ने सन्देशलाई सुव्यवस्थित र सरल बनाउने अवसर पनि हो ।
विशेष गरी कागजी तथ्याङ्कमा समावेश नभएका समूह र अन्य जनसङ्ख्याका लागि धेरै काम गर्नु महत्त्वपूर्ण रहेको रेड क्रसकी भिकी माउको भनाई छ ।
र, बेनी बोल देशका निर्णय क्षमता भएका नेताहरूलाई सामुदायिक अगुवाहरूले बाँडेको सूचनाहरू अङ्गाल्न अनुरोध गर्दछन् ।
महामारीलाई परास्त गर्न यो दुई तर्फी बाटो भएको उनको धारणा छ ।
यता अस्ट्रेलियाको खोप कार्यक्रम द्रुत गतिमा अगाडी बढ्दै गर्दा स्वास्थ्य अधिकारीहरू भने पहुँचका लागि कठिन मानिएका आप्रवासी समुदायका सदस्यहरू खोप केन्द्रहरूमा लामबद्ध भएर खोप लगाएको हेर्न चाहन्छन् ।
