現居墨爾本的 Elly，是一位做了十年以上的護士，同時亦是一名專門為新娘服務的化妝師。她笑言，自己踏入化妝行業，最初並不是因為時尚或夢想，而是因為一張「暗瘡臉」。
「我本身係一個好唔自信嘅病人，對自己皮膚好介意。當護士輪班、失眠、壓力大，皮膚就係咁爆暗瘡。」
Elly 當時心想：「如果我塊面係咁，除咗護膚之外，仲有冇一個方法，起碼喺重要嘅場合，都可以畫靚少少，自信啲見人？」
Source: Supplied / Elly
在香港日夜更之間的「第二職業」
在香港，Elly 當護士期間已經開始學化妝。大學畢業後，她選擇到離家較近的醫院工作，一做便接近十年。同一時間，她亦慢慢累積新娘化妝經驗。
「我一個禮拜返五日長短更，最誇張嗰陣，可能凌晨四、五點起身去幫人化妝，跟住中午前趕返醫院繼續輪班。」
對於外人來說，這種生活近乎「自討苦吃」。但在 Elly 看來，這是她為未來鋪路的必經階段。
「如果你想搵高人工，就要預咗辛苦；你想輕鬆啲，就可能揀啲無咁辛苦但收入有限嘅嘢。每一樣都係取捨。」
在忙碌的醫院和婚禮現場之間穿梭，Elly 慢慢發現，化妝給自己的，不止是遮蓋瑕疵的技術，還有一點一滴累積回來的自信。
一個禮拜返五日長短更，最誇張可能凌晨四、五點起身去幫人化妝，跟住中午前趕返醫院繼續輪班。Elly
機會來到：無縫接軌的墨爾本醫院生活
幾年前，正值澳洲放寬護士簽證與招聘條件，一間墨爾本醫院向 Elly 伸出橄欖枝。
醫院不但願意為她辦理簽證，還包辦頭一個月住宿，以及她和伴侶的機票。於是，她決定把握這個機會，從香港直接飛到墨爾本的醫院上班。
「我覺得趁仲後生，呢個機會喺度就先做咗先。如果過多五年，我仲喺度諗，可能個窗口已經關咗。」
Source: Supplied / Elly
「我冇諗過，原來做手術嘅時候，醫生係一路同你傾偈，仲會同埋病人一齊傾。」
「佢哋會記得每個護士嘅名，記得你上次講過啲咩，甚至會問你隻狗叫咩名。呢種 真正嘅關心，喺香港手術室真係比較少感受到。」
她形容，雖然澳洲醫院工作同樣很忙，但節奏不同、人手分工較清晰，同事之間多了尊重與幽默，令她慢慢適應了這邊的生活。
我覺得趁仲後生，機會喺度就做咗先。過多五年，可能個窗口已經關咗。Elly
讓化妝成為「正職」
在墨爾本工作兩年後，Elly 開始認真思考自己未來的路。護理工作穩定、專業受尊重，但她發現，真正令自己眼睛發光的，是婚禮化妝。
「做護士，你當然知道自己幫到人，但有時你係系統入面一個齒輪。」
「做化妝師，當我遇到濕疹、敏感、冇自信嘅客人，逐步同佢哋討論、幫佢設計妝容，化完之後佢望住鏡真心多謝嗰下，我覺得自己對佢嘅影響好大。」
於是，她做了一個很多人不敢做的決定：將新娘化妝變成全職，護士工作則改為於護老院做散工（casual）一星期只上班一、兩日。
這個選擇，讓她保留專業身份與收入安全網，同時可全心發展個人品牌與化妝事業。
訪問中 Elly 談到自己十分嚮往、亦已經實踐的「斜槓生活」。
香港 vs 墨爾本：兩種婚禮節奏
談到新娘化妝，Elly 亦很真實地比較了兩地差異。
在香港，多數新娘會選擇全日跟妝服務，清晨敬茶、儀式、出門、晚宴，每一個環節都要換妝、換頭，化妝師幾乎是「從天未光做到收檔」。
「香港新娘嘅審美要求比較高，妝要對抗潮濕、焗促同長時間；收入可以相對好啲，但真係好攰。」
相反，在墨爾本，大部分客人只會預約早上的化妝及髮型，一個造型走整天。由於氣候較乾爽，妝容和髮型的更持久，整體工作節奏亦相對輕鬆。
「喺度好多時化完一個新娘、一兩個姊妹，我就可以返屋企補眠。」她笑說。
收入固然未必及得上香港全日跟妝，但換來的是更均衡的生活，以及時間上的主導權。
化妝唔只係畫靚塊面，而係令人夠膽行出第一步、望住自己覺得『我都得㗎』嗰份自信。Elly
情緒價值：化妝亦是「治療」
Elly 曾自稱「冇自信嘅化妝師」，她不諱言，自己曾經因為皮膚問題自卑，正因如此，她對每一位走進鏡前、坐上化妝椅的女生，都有額外的同理心。
「有啲客人係濕疹，有啲係暗瘡，有啲係真係唔識點樣扮靚。當我一步一步幫佢，最後佢望住鏡，原來自己可以咁靚，嗰種感覺其實係治療咗佢內在一部分。」
她相信，化妝不只是技術，也是一種情緒支援（emotional value）：「化妝唔只係畫靚塊面，而係令人夠膽行出第一步、望住自己覺得『我都得㗎』嗰個自信。」
Source: Supplied / Elly
為未來預備：斜槓人生
Elly 談到自己十分嚮往、亦已經實踐的「斜槓生活」。在她眼中，這種模式特別適合在海外生活的華人，尤其是準備成家立室的女生。
「我見到喺澳洲好多朋友都有第二技能：有人幫人做插花，有人教瑜伽、教打波，乜都有。」
「如果有一日生BB，冇工人姐姐、又未必有四大長老，你又唔想完全做全職媽媽，其實而家係咪可以先學一樣嘢，將來都搵到少少錢幫補屋企。」
我見到喺澳洲好多朋友都有第二技能：做插花，教瑜伽、教打波，乜都有。Elly
在她看來，與其等到人生被迫轉彎時才匆忙找出路，不如趁還有時間時，先栽培一項令自己開心、又有可能變成收入來源的技能。
「機會幾時出現我控制唔到，但我可以控制自己準備好未。」
從香港私家醫院到墨爾本婚禮現場，從自卑暗瘡到幫別人重建自信，Elly 用自己的經歷，示範了一種不那麼戲劇化、卻真實可行的移民與轉職故事。
立即收聽今集《人物誌》。
SBS 中文堅守《SBS 行為守則》等政策，以繁體中文及簡體中文提供公平、公正、準確的新聞報道及時事資訊。SBS 廣東話及 SBS 普通話均已為大眾服務超過 40 年。歡迎在每天早上 9 至 11 時透過 SBS Radio 1 收聽廣東話節目及在每天早上 7 至 9 時收聽普通話節目，或透過 SBS Audio App 手機應用程式收聽直播、節目重溫及其他語音內容。按此進一步了解 SBS 中文。
